নগাঁওঃ অৱশেষত মুকলি আকাশৰ তললৈ ওলাই অহাৰ বাট প্ৰশস্ত হ’ল ৫ প্ৰাক্তন আলফাৰ৷ ৰাজ্যজুৰি প্ৰতিবাদৰ জোৱাৰ উঠাত ৰাইজৰ ধৈৰ্য্যৰ বান্ধ খোলাৰ পুৰ্বে প্ৰশাসনে মুকলি কৰি দিয়াৰ কথা ঘোষণা কৰে নগাঁও কাণ্ডত ব্যৱসায়ীৰ হাতত প্ৰহৃত প্ৰাক্তন আলফা কেইজনক৷
খিলঞ্জীয়া যৌথ মঞ্চৰ দাবী মানি লৈ প্ৰশাসনে এই সিন্ধান্ত লয়৷ ৰাজ্যজুৰি তীব্ৰ প্ৰতিবাদ অব্যাহত থকাৰ অন্তত মুন বৰা সহ আন চাৰিজন সহযোগী ৰাতুল বৰদলৈ, নিতু বৰা, ললিত বৰা আৰু দণ্ডি ডেকাক বিনাচৰ্তে মুকলি কৰি দিয়াৰ প্ৰতিশ্ৰুতি দিয়ে প্ৰশাসনে৷ প্ৰশাসনৰ এনে সিদ্ধান্তত উৎফুল্লিত প্ৰাক্তন আলফা, আলফা সমন্বয়ৰক্ষী সমিতিকে ধৰি আন জাতীয় দল-সংগঠন৷
আৰক্ষীয়ে প্ৰৰোচনামূলকভাৱে কৰায়ত্ত কৰা মুন বৰা আৰু সহযোগীকেইজনক বিনাচৰ্তে মুক্তিৰ দাবীত আজি তীব্ৰ প্ৰতিবাদেৰে নগাঁও কপাঁই তুলিছিল খিলঞ্জীয়া ঐক্য মঞ্চই৷
আৰক্ষীয়ে আটক কৰা প্ৰাক্তন আলফাকেইজনক মুক্তিৰ বাবে দুঘন্টা সময়সীমা বান্ধি দিছিল প্ৰতিবাদকাৰীসকলে৷ আনকি প্ৰাক্তন আলফাই ইয়াৰ অন্যথা হাতত পুনৰ অস্ত্ৰ তুলি লোৱাৰো হুংকাৰ দিছিল৷