মৰাণঃ উন্নয়ণৰ প্ৰতিশ্ৰুতি দি শাসনৰ গাদীত বহা ৰাজ্যৰ মিত্ৰ জোঁটৰ চৰকাৰৰ বিৰুদ্ধে এতিয়া ৰাজ্যজুৰি আৰম্ভ হৈছে ক্ষোভ-প্ৰতিবাদ৷ শাসনৰ গাদীত বহাৰ প্ৰায় ১৭ মাহ পাৰ হল যদিও গ্ৰাম্য অঞ্চলৰ ৰাইজে ক্ৰমান্বয়ে চৰকাৰৰ বিৰুদ্ধে লাহে লাহে বিতুষ্ট হৈ পৰিছে৷

বাট-পথ, বিশুদ্ধ খোৱাপানী, শিক্ষা স্বাস্থ্য কোনো ক্ষেত্ৰত উন্নয়ণৰ মুখ নেদেখা ৰাইজে এতিয়া প্ৰতিবাদ কৰিবলৈ আৰম্ভ কৰিছে চৰকাৰৰ বিৰুদ্ধে৷ ডিব্ৰুগড় জিলাৰ মৰাণত বুধবাৰে পথ মেৰামতিৰ দাবীত ৰাজ পথলৈ ওলাই আহে ৰাইজ৷ বিধস্তপ্ৰায় ৩৭নং ৰাষ্ট্ৰীয় ঘাইপথ মেৰামতিৰ দাবীত মৰাণত ঘাই পথ অৱৰোধ কৰি উত্তাল প্ৰতিবাদ সাব্যস্ত কৰে৷

শতাধিক লোকে পথ অৱৰোধ কৰি ৰাজ্য চৰকাৰৰ বিৰুদ্ধে ক্ষোভিত হৈ পৰে৷ অৱৰোধস্থলিত বিভাগীয় কৰ্তৃপক্ষ উপস্থিত হৈ প্ৰতিবাদকাৰীক শান্ত বুজনি দিবলৈ ধৰাত ক্ষোভৰ সন্মুখীন হ’ব লগা হয়৷ ৰাইজে ঘাই পথটো শীঘ্ৰে মেৰামতি কৰিবৰ বাবে প্ৰশাসনৰ পৰা লিখিত প্ৰতিশ্ৰুতি বিচাৰে৷ প্ৰশাসনে ১০ দিনৰ ভিতৰত মেৰামতি কৰাৰ প্ৰতিশ্ৰুতি দিয়াত ক্ষান্ত হয় ৰাইজ৷