লংকাঃ হোজাই জিলাৰ লংকা চহৰৰ সমীপৰ কাকী চলচলি মধ্য ইংৰাজী বিদ্যালয়ত বৃহস্পতিবাৰে চৰকাৰে যোগান ধৰা পেলুৰ ঔষধ সেৱন কৰি কেইবাগৰাকী ছাত্ৰ-ছাত্ৰী অসুস্থ হয়৷

বিদ্যালয়খনৰ  শিক্ষকে ছাত্ৰ-ছাত্ৰীক পেলুৰ ঔষধ সেৱন কৰাৰ পাছতে তিনিগৰাকী ছাত্ৰ-ছাত্ৰীৰ সামান্য ভাৱে মূৰ ঘূৰণি আৰু বমি হয় যদিও পৰৱৰ্তী সময়ত প্ৰায় ৩০ গৰাকী ছাত্ৰ-ছাত্ৰী অসুস্থ হৈ পৰে৷ বিদ্যালয়ৰ পৰা ঘৰলৈ যোৱাৰ পিছত অসুস্থ হৈ পৰা ছাত্ৰ-ছাত্ৰীসকলৰ বিয়লি স্বাস্থ্যৰ অধিক অৱনতি ঘটাত অভিভাৱক চিন্তিত হৈ পৰে৷

পিছত ১০৮ এম্বুলেন্সৰ জৰিয়তে কাকী প্ৰাথমিক স্বাহ্য কেন্দ্ৰলৈ ছাত্ৰ-ছাত্ৰী সকলক লৈ যায়৷ অসুস্থ হৈ পৰা ছাত্ৰ-ছাত্ৰীৰ সংখ্যা বৃদ্ধি পোৱাত লংকাৰ প্ৰাথমিক স্বাস্থ্য কেন্দ্ৰত থকা ১০৮ মৃত্যুঞ্জয় সেৱাৰ সহায় ল'বলগীয়া হয়৷ আনহাতে, ছাত্ৰ-ছাত্ৰীসকলক বিদ্যালয়ত খাৱলৈ দিয়া পেলুৰ প্ৰতিষেধক ঔষধসমূহৰ ম্যাদ উকলি যোৱা বুলি অভিযোগ উত্থাপন কৰে অভিভাৱকে৷