হাজোঃ কেন্দ্ৰীয় চৰকাৰে নাৰী নিৰ্যাতন ৰোধ কৰিবলৈ দেশত নতুন আইন প্ৰৱৰ্তন কৰিলেও কিন্তু হ্ৰাস পোৱা নাই নাৰী নিৰ্যাতনৰ ঘটনা৷ দেশ তথা আমাৰ ৰাজ্যখনত সংঘটিত নাৰী নিৰ্যাতনৰ ঘটনাই দেশৰ মান-মৰ্যাদাত আঘাত হানিছে৷ দেশত সংঘটিত কেইবাটাও ঘটনাৰ আৰক্ষীয়ে জোৰদাৰ তদন্ত অব্যাহত ৰখাৰ সময়তে মঙলবাৰে অসম আৰক্ষীৰ গাত দাগ লগালে এগৰাকী আৰক্ষী বিষয়াই৷
ৰক্ষকে ভক্ষক হোৱাৰ লেখিয়াকৈ এগৰাকী কিশোৰীক যৌন নিৰ্যাতন চলোৱাৰ গুৰুতৰ অভিযোগ উত্থাপন হৈছে৷ সেয়াও আন ঠাইত নহয়, খোদ আৰক্ষী থানা চৌহদৰ ভিতৰতে কিশোৰীক নিৰ্যাতন চলোৱাৰ অভিযোগ উত্থাপন হৈছে কামৰূপ জিলাৰ ৰামদিয়া আৰক্ষী থানাৰ ভাৰপ্ৰাপ্ত আৰক্ষী বিষয়া বিনোদ দাসৰ বিৰুদ্ধে৷ জানিব পৰা মতে, দুদিন পূৰ্বে কিশোৰীগৰাকীক থানা চৌহদলৈ আনি কিশোৰীক যৌন নিৰ্যাতনৰ অভিযোগ উত্থাপন হয়৷
হাজোৰ সমীপৰ ৰামদিয়া থানাৰ ভাৰপ্ৰাপ্ত আৰক্ষী বিষয়াই এগৰাকী কিশোৰীক নিৰ্যাতন চলোৱাৰ ঘটনাই চাঞ্চল্যৰ সৃষ্টি কৰে৷ কিশোৰীৰ পৰিয়ালে অভিযোগ উত্থাপন কৰা অনুসৰি ৰামদিয়া থানাৰ ভাৰপ্ৰাপ্ত আৰক্ষী বিষয়া বিনোদ দাসে আৰক্ষী থানাৰ এটা আৱাসত আবদ্ধ কৰি কিশোৰীগৰাকীৰ ওপৰত যৌন নিৰ্যাতন চলায়৷
মঙলবাৰে নিৰ্যাতিতা কিশোৰীগৰাকীৰ পৰিয়ালে ৰামদিয়া থানাৰ ভাৰপ্ৰাপ্ত আৰক্ষী বিষয়া বিনোদ দাসৰ বিৰুদ্ধে এজাহাৰ দাখিল কৰাৰ পিছতে কামৰূপ জিলা আৰক্ষীয়ে দুগৰাকী উচ্চপদস্থ মহিলা আৰক্ষী বিষয়াক ঘটনাৰ তদন্তৰ দায়িত্ব অৰ্পণ কৰিছিল৷
তাৰ পিছতে কিশোৰীগৰাকীৰ মন্তব্যৰ ভিত্তিত বুধবাৰে অভিযুক্ত আৰক্ষী বিষয়াগৰাকীক কামৰূপ জিলা আৰক্ষীয়ে আটক কৰে৷