মৰিয়নীঃ ৰাজ্যত বৃদ্ধি পাইছে ধৰ্ষণ, অপহৰণৰ দৰে ঘটনা৷ যাৰ পৰিপ্ৰেক্ষিতত ৰাজ্যৰ শান্তি সম্প্ৰীতি ধ্বংস হোৱা পৰিলক্ষিত হৈছে৷ ইফালে চুবুৰীয়া ৰাজ্য নাগালেণ্ডৰ লগত সংঘটিত হৈ থকা বিবাদেও মুৰৰ কামোৰণি তুলিছে অসমবাসী ৰাইজৰ৷ 

যোৱা ২১ এপ্ৰিলত নগা দুৰ্বৃত্তই অপহৰণ কৰা অসমৰ দুজন গাড়ী চালক আৰু হেণ্ডিমেনৰ মুক্তিপণ হিচাপে ২০ কোটি টকা দাবী কৰিছিল নগা দুৰ্বৃত্তই৷ কিন্তু অপহৰণ কাণ্ড সংঘটিত হোৱাৰ ১০ দিন পিছতো চালক-হেণ্ডিমেন দুগৰাকীক মুক্ত কৰি আনিবলৈ অসম চৰকাৰে কোনো ব্যৱস্থা গ্ৰহণ নকৰাত ৰাজ্য জুৰি তীব্ৰ প্ৰতিক্ৰিয়াৰ সৃষ্টি হয়৷ 

বৃহস্পতিবাৰে অপহৃত চালক-হেণ্ডিমেনক মুক্ত কৰি অনাৰ দাবীত মৰিয়নীত কংগ্ৰেছ দলে প্ৰতিবাদ সাব্যস্ত কৰে৷ এই প্ৰতিবাদ কাৰ্যৰ নেতৃত্ব বহন কৰে মৰিয়নীৰ কংগ্ৰেছী বিধায়ক ৰূপজ্যোতি কুৰ্মীয়ে৷ 

কংগ্ৰেছৰ প্ৰতিবাদকাৰী সকলে বৃহস্পতিবাৰে মৰীয়নী-মোককচাং সংযোগী ঘাইপথটো অৱৰোধ কৰি অপহৃত চালক হেণ্ডিমেন দুগৰাকীক নগা দুৰ্বৃত্তৰ হাতৰ পৰা মোকলাই আনিবলৈ চৰকাৰক দাবী জনায়৷ কংগ্ৰেছৰ এই প্ৰতিবাদত আদিবাসী ছাত্ৰ সন্থাইও সহযোগ আগবঢ়াই প্ৰতিবাদী আন্দোলন তীব্ৰ কৰি তোলে৷